ఇం‌ట్లో ఖాళీగా కూర్చోకుండా ఆ దంపతులు ఏకంగా బావినే తవ్వేశారు.

ఎగతాళి చేసిన పొరిగింటివాళ్ళే ప్రశంసించారు...
వాళ్లు కష్టాన్ని నమ్ముకున్న జీవులు. ఇంట్లో ఖాళీగా ఉండి టీవీలు, మొబైళ్లు చూస్తూ.. వెరైటీ వంటకాలు వండుతూ కాలక్షేపం చేయలేని నిరుపేదలు. లాక్‌డౌన్‌ ‌వల్ల బయట పనులు లేక ఇంటికే పరిమితమైన ఆ దంపతులకు.. ఎన్నాళ్ల నుంచో ఎదుర్కొంటున్న నీటి సమస్య గుర్తుకొచ్చింది. తమ నీటి అవసరాలు తీరాలంటే బావి ఉండాలని భావించారు. కానీ, మొదట్లో అది సాధ్యమేనా అని సందేహించారు. ప్రయత్నిస్తే పోయేది ఏముందని ఆ పనికి నడుంకట్టారు. చివరికి సాధించారు. ఈ ఘటన మహారాష్ట్రలోని వసీం జిల్లా కర్ఖేడా గ్రామంలో జరిగింది.

కర్ఖెడాలో నీటి సరఫరా అంతంత మాత్రంగానే ఉంటుంది. దీంతో గజానన్‌ ‌దంపతులు తమ ఇంటి వద్దే బావిని తవ్వాలని నిర్ణయించుకున్నారు. పలుగు, పారా పట్టుకుని పని మొదలుపెట్టారు. అలా కొంచెం మట్టిని తవ్వేస్తూ 21 రోజుల్లోనే ఎవరి సాయం లేకుండా 25 అడుగుల లోతైన బావిని తవ్వేశారు. అయితే, వారి శ్రమ వృథాపోలేదు. వారి కష్టాన్ని చూసి.. గంగమ్మ పరవళ్లు తొక్కింది.. ఆ దంపతులు ఎలాంటి ఆధునిక పరికరాలు ఉపయోగించకుండా చేతి పనిముట్లతోనే బావిని తవ్వేయడం గమనార్హం. ఈ సందర్భంగా గజానన్‌ ‌మాట్లాడుతూ.. ‘‘కరోనా వైరస్‌ ‌లాక్‌డౌన్‌ ‌వల్ల మేం బయటకు వెళ్లడం లేదు. దీంతో నీటి అవసరాలను తీర్చుకొనేందుకు బావిని తవ్వాలని నిర్ణయించుకున్నాం.  పూజ చేసిన తర్వాత బావిని తవ్వడం మొదలుపెట్టాం. కొందరు  ఎగతాళి చేశారు. 21వ రోజే గంగమ్మ తల్లి 25 అడుగుల ఎత్తుకు చేరింది. ఇప్పుడు అందరూ వాడుకునేందుకు నీళ్ళు లభించాయి’’ అని అన్నాడు.